Totone, de 18 anos, pasa a meirande parte do tempo bebendo cervexas e de festa na rexión do Jura co seu grupo de amigos. Pero a realidade atrápao: ten que coidar da súa irmá de 7 anos e gañar a vida. Daquela proponse fabricar o mellor queixo Comté da rexión, o que o faría gañar a medalla de ouro no concurso agrícola e 30.000 euros.

A receita perfecta é unha conmovedora comedia que retrata con grande intelixencia os lazos familiares e afectivos duns personaxes cheos de graza e ansiosos de aventura. Ambientado na contorna rural francesa, este filme naturalista repleto de matices foi distinguido con importantes galardóns, como o de Mellor ópera prima e Mellor actriz revelación nos Premios César, o Premio da Xuventude no Festival de Cannes ou o Premio Punto de Encontro e do Público na SEMINCI de Valladolid.