A libraría

Libraría NUMAX naceu en 2015 con vocación de ofrecer unha escolla orixinal e diversa de libros e converterse en lugar de encontro entre o público e os distintos axentes culturais implicados no mundo do libro. Viñemos para sumar e, así, enriquecer o mapa de librarías da cidade.

Nun espazo de pouco máis de 40 m2 alberga unha media de 6000 referencias, e un estoc duns 7000 exemplares. Comparte espazo co cinema NUMAX, pero non é unha libraría especializada en cinema, é unha libraría de tipo xeralista con especialización: ten seccións de narrativa, poesía, teatro, pensamento, historia, arte, música, cinema, banda deseñada e libro infantil e xuvenil, así como seccións variables. Ofrece os títulos máis salientables do mercado español, canda a outros de mercados internacionais, tanto de fondo como de novidade, sempre a través da escolla persoal das libreiras. Traballa, xa que logo, libros en galego e castelán, pero tamén en catalán, portugués, inglés e francés e edicións latinoamericanas. Alén de libros, conta cunha pequena selección de música en Cd e vinilo e alberga no seu fondo de audiovisuais as máis prestixiosas coleccións internacionais de filmes en Dvd e bluray. Xestionamos todo tipo de pedidos, incluíndo libros esgotados ou difíciles de conseguir.

Contamos con persoal que ten formación libreira e máis en Humanidades, ademais de experiencia previa no sector,  o que nos permite desenvolver o noso traballo nun marco de profesionalidade e calidade.

Compartimos espazo co Cinema NUMAX e temos un pequeno ambigú con servizo de café e outras bebidas. Ademáis, contamos cunha tenda online, cun catálogo en constante crecemento que vai xa polas 25.000 referencias.

Conscientes do valor da libraría independente como mediador cultural, reivindicamos o libro e a lectura como fontes imprescindibles para o desenvolvemento crítico das persoas.