Chile, 1973. Tras o golpe militar de Pinochet, centos de militantes de esquerda latinoamericanos refúxianse na embaixada arxentina á espera dun visado para abandonar o país. Pedro, de 12 anos, e Ana, de 11, fillos de activistas, coñécense durante este confinamento forzado. Mentres os adultos afrontan a incerteza e as dificultades do exilio, os dous nenos descobren unha inesperada sensación de liberdade, amizade e o seu primeiro amor.

Flávia Castro, cineasta brasileira criada no exilio, traballa entre o documental e a ficción. Debutou na longametraxe con Diário de uma busca (2011), documental premiado en numerosos festivais internacionais. A súa primeira ficción, Deslembro (2018), estreouse na sección Horizontes do Festival de Venecia. Con As vitrines, continúa a exploración da memoria, o exilio e as consecuencias das ditaduras latinoamericanas.