Aos seus 70 anos, Nando está seriamente enfermo. É o momento crítico que serve de catalizador para un relato biográfico que alterna a crónica do presente coa lembranza do pasado. O retrato cambiante do protagonista, que lembra sen pudor anos de máscaras, procuras e exploracións, vaise perfilando ao longo dunha narración descontinua que transita desde a súa retomada actividade política a raíz do movemento 15-M; ao seu activismo ácrata durante as revoltas estudantís antifranquistas ou, tras o exilio francés, desde as súas etapas de adicción á heroína ao seu actual compromiso coa práctica da meditación budista como ferramenta de transformación persoal e social.