George é o típico burgués: presenta un programa literario en televisión e leva unha vida acomodada coa súa muller e o seu fillo adolescente. Pero, de súpeto, empeza a recibir uns paquetes anónimos que conteñen fitas de vídeo, gravadas desde a rúa, e uns debuxos inquietantes cuxo significado é un misterio. Non saben quen llos envía; pero as secuencias que aparecen nas fitas son a cada pouco máis persoais, o que parece indicar que o remitente o coñece desde hai tempo. George sente unha ameaza aproximarse pero, como non hai evidencias de delito algún, a policía non pode intervir.