No nacemento da Segunda República, Miguel de Unamuno é considerado unha das pedras fundacionais do novo réxime. É proposto mesmo para presidir a República. Só 5 anos máis tarde, Unamuno será enterrado. Con honras falanxistas. Palabras para un fin do mundo é unha minuciosa, prolongada e decisiva investigación. Novas probas e documentos inéditos verán a luz 84 anos despois para coñecer, por fin con rigor histórico, as palabras e os feitos protagonizados por Unamuno e Millán-Astray aquel 12 de outubro de 1936. Mostrará ademais, e quedará probado, como a propaganda conseguiu, ata o propio día da súa morte, explotar a figura de Unamuno na orquestración dunha das primeiras e máis elaboradas ‘fake news’ de toda a nosa Historia.