Nun apartamento en Lisboa, Marta entrégase aos coidados maternais da súa primeira filla recentemente nada, á vez que convalece do parto. Nestes primeiros tempos son visitadas por familiares e amigos que ao involucrarse no espazo íntimo da casa narran historias sobre o matrimonio, o nacemento dos fillos, os primeiros traballos, as expectativas e os proxectos de futuro. Nas diversas secuencias, asistimos en Tempo común ao desenvolvemento do ciclo da vida narrado en varias voces, creando fragmentos que se mesturan co momento que Marta está a vivir.