'Crear Porvir. 75 anos de Editorial Galaxia' é un documental que viaxa a través das máis de sete décadas de historia da Editorial Galaxia para reflexionar e compartir a historia e os valores dunha das institucións culturais máis emblemáticas do noso país.

Fundada en 1950, nun contexto de posguerra e de represión, a Editorial Galaxia nace desde a vontade de dignificar a lingua galega e manter con vida o legado da nosa cultura. Desde ese esforzo de crear porvir, convertémonos en testemuñas de como Galaxia impulsa a cultura galega desde un concepto amplo e científico, promove a renovación e modernización da nosa literatura e profesionaliza a editorial mentres continúa abrindo camiños de innovación.