András volve a Hungría de Estados Unidos tras unha tempada vivindo alí e atópase sen muller, traballo nin amigos. Nin sequera é quen de retomar a relación coa súa antiga amante. Totalmente perdido, cunha mestura de sentimentos entre o rexeitamento e a pertenza ao seu lugar de orixe, coñece a unha nena que toma como filla adoptiva. Ambas almas desarraigadas apóianse a unha á outra.

Anna Karina é a amante de Jan Nowicki neste drama que dalgunha forma traslada os sentimentos de Mészáros cara o seu país nesa altura. Cada vez máis a miúdo en Polonia e Francia, a directora empeza a rexeitar un sistema de produción que non lle permite realizar filmes máis ambiciosos. A partir de aquí iniciará un período de autoimposto exilio artístico. Coma na casa fala deste sentimento de desarraigo e rexeitamento, mentres reflexiona sobre os lazos que nos ligan aos lugares onde medramos.

Sesión presentada por Víctor Paz, responsable da distribuidora Lost & Found