James Benning e Richard Linklater son amigos desde hai máis de vinte anos e durante este tempo mantiveron contínuas discusións ao redor do mundo e do cinema. As súas cinematografías respectivas están atravesadas por unha forma de entender o cinema en relación co tempo e, neste filme documental, Gabe Klinger xúntaos para explorar isto e máis como o tempo marcou tamén a súas vidas e a súa amizade.

O filme Double Play de Gabe Klinger, que nos acompañará para presentar a sesión e manter un Q&A ao rematar, irá precedido pola curtametraxe Chicago Loop, un filme de 8 minutos que James Benning realizou en 1976.

Esta sesión é posíbel grazas á amábel colaboración de Gabe Klinger e Curtocircuíto 2015.