Os Centros de Internamento de Estranxeiros (C.I.E.s) en España son buracos negros para os Dereitos Humanos: sendo cárceres para persoas inocentes, que son encerradas sen cometer ningún delito, mantéñense ocultos á opinión pública, dificultando o acceso a xuíces, xornalistas e ONGs. MAKUN (NO LLORES) é un documental de animación que dá vida aos miles de debuxos atopados nas paredes dun C.I.E. canario, e que recolle o testemuño de tres persoas migrantes, para falar sobre soños e pesadelos (os caiucos, os C.I.E.s), arrolados pola nana que dá título á curta pero reclamando a necesidade de espertar e esixir o cumprimento dos Dereitos Humanos.

Coa presenza do director, Emilio Martí, e Thimbo Sam, unha das testemuñas do documental. Entrada gratuíta até completar aforo, podes reservar praza na nosa web ou na billeteira do cinema, máximo 2 convites por persoa.

Esta proxección forma parte do ciclo de cinema e migración Realidades agochadas, un proxecto desenvolvido por Eido Cultural e financiado polo programa Iniciativa Xove da Xunta de Galicia.