O guineano Idrissa Diallo, de 21 anos, faleceu nunha cela dun Centro de Internamento de Estranxeiros de Barcelona. Un feito do que ninguén se fixo responsábel, que se pretendeu silenciar e co que o activista e cineasta Xavier Artigas (Ciutat Morta) constrúe un relato colectivo tan sangrante como esperanzador. Pouco ou nada sabemos dos miles de migrantes que viven nas nosas cidades. Se as novas sobre o caso do manteiro senegalés Mame Mbaye abriron unha fiestra a esas vidas, Idrissa vai un paso alén: non se trata só de contar unha historia, senón do uso efectivo do cinema como ferramenta de acción e cambio.