Ao atopar dous vellos cadernos nunha caixa esquecida, Marguerite Duras recorda o seu pasado. Na Francia ocupada polos nazis de 1944, a moza e brillante escritora participa activamente na Resistencia canda o seu marido, Robert Antelme. Cando Robert é deportado pola Gestapo, Marguerite embárcase nunha loita desesperada para conseguir que volva. A fin da guerra e o regreso dos prisioneiros supoñen para Marguerite o comezo dunha espera insoportábel, unha agonía lenta e calada en medio do rebumbio nas rúas parisinas pola Liberación.