Inverno de 1862. En plena Guerra de Secesión, o exército estadounidense envía unha compañía de soldados voluntarios aos territorios do oeste, coa misión de patrullar as inexploradas terras fronteirizas. A medida que a súa misión cambia de rumbo, o significado do seu compromiso comeza a escapárselles.

Na liña de westerns despoxados de épica como Dead Man ou Meek’s Cutoff, o reputado documentalista Roberto Minervini debuta na ficción virando a súa mirada cara ao pasado estadounidense para abordar un dos seus fitos fundacionais. O arquetipo clásico da patrulla do exército perdida desenvólvese nun terreo fantasmagórico, de tensión permanente, onde un grupo de soldados senten o axexo dun inimigo invisible, inmobilizados pola incerteza e arrasados polas dúbidas existenciais, que comparten ante unha fogueira polas noites.