No universo dunha plantación de mate, un capataz sen escrúpulos descobre que un dos traballadores namorou da filla do médico da cidade e desata unha guerra persoal contra el. A tensión medra e os efectos da violencia vólvense irreversibles. O filme foi escollido en numerosas ocasións como un dos mellores da historia do cinema arxentino.

Notas sobre a restauración

Esta película —fito do cinema arxentino— existía unicamente en copias en 16mm. O Museo do Cinema Pablo Ducrós Hicken de Buenos Aires atopou unha copia en 35mm en excelente estado de conservación en Francia, que proviña directamente do negativo orixinal, e outra copia en 35mm na Filmoteca Nacional Checa en Praga. Ambas serviron para realizar a restauración dixital no laboratorio L'Immagine Ritrovata de Bologna, coa colaboración da Film Foundation de Martin Scorsese.

Presenta a arquivista e restauradora Carolina Cappa