Os habitantes dun barrio da cidade brasileira de Recife séntense inseguros e contratan unha empresa que os protexa. Esta incursión, que pretende loitar contra a desconfianza instalada entre os membros dunha comunidade relativamente tranquila, altera a vida das súas rúas, aínda que a cotiandade pronto atopa o seu rumbo. Unha nai nova con dous fillos non atura os ladridos do can da casa do lado, un mozo namorado intenta descubrir quen roubou o coche da súa amada, un delincuente de medio pelo pretende limpar a súa imaxe, mentres un home acomodado aspira a protexer os seus bens e unha asistenta goza, no mellor sentido, da situación. Esta primeira longametraxe do realizador brasileiro Kleber Mendonça Filho percorre a través dos sons, do interior e do exterior dunhas paredes e unhas portas que illan aos individuos, as relacións entre as persoas e o como sobrevivir á súa existencia.