Elaine, a bruxa do título, utiliza os seus coñecementos en pocións, feitizos e rituais para que os homes caian rendidos ante ela. Pero os seus poderes son demasiado fortes e as vítimas multiplícanse. Cando coñece o home dos seus soños, agudízase o seu narcisismo patolóxico e a súa desesperación por ser amada lévaa a cometer toda clase de excesos. Cunha estética vintage que rende tributo ás películas en Technicolor dos anos sesenta e setenta e unha magnífica dirección artística, a directora Anna Biller revive nesta terrorífica traxedia a imaxe das bruxas como símbolo da liberdade sexual feminina, e explora con demoníaca lucidez certas fantasías intrínsecas ao xénero.