Obras públicas é unha escolma de textos de Marcos Lorenzo publicados en diferentes revistas, blogues e folletos entre os anos 2006 e 2015. Unha sorte de apuntes ao natural sobre temas tan variados como a noción de liberdade, o fútbol, deus, a ciencia, o tabaco, a prensa ou a memoria, e sempre desde unha mirada antropolóxica non exenta de humor. Ao longo das súas páxinas desvélase cantos lugares comúns, perfectamente absurdos ou insignificantes, empregamos no noso pensamento cotián ou no debate público.
O capítulo final, Galicia en liquidación, bosquexa unha teoría sobre o proceso de modernización do país na segunda metade do século XX.
Con este libro inaugúrase a colección editorial Intemperie, dedicada a analizar o cambio social e cultural na Galicia das últimas décadas, así como a estimular a reflexión sobre os dilemas do presente ou as perspectivas de futuro.