En 2012, un grupo de arqueólogos descobre as primeiras pinturas rupestres de Galicia no interior da Cova de Eirós, nos Ancares lucenses. Este fito engadiu valor inmediato a un xacemento que a día de hoxe segue sendo o máis importante do paleolítico galego e que o realizador Xose González Varela xa levaba rexistrando desde 2011.

Durante unha década de gravacións, Varela fixo un seguimento íntimo e minucioso do traballo dos especialistas, e a súa convivencia coa veciñanza e o espazo natural deu lugar a O camiño de Cova Eirós, un documental de 52 minutos que ofrece unha mirada inédita sobre a arqueoloxía galega. O filme terá un pase especial en NUMAX o sábado 20 de decembro ás 17:30h con presenza do seu autor e do arqueólogo Arturo de Lombera, no que afondarán no proceso creativo do documental e tamén no propio traballo arqueolóxico no lugar.

Por mor da duración da peza, o evento contará cunha tarifa especial reducida de 5€ para público xeral e 3,5€ para abonadas de NUMAX.

Xose González Varela (Lugo, 1983) é técnico superior en realización audiovisual e arquitectura efémera. Comeza en 2005 como montador de documentais, programas de televisión e vídeos publicitarios. Paralelamente realiza curtametraxes experimentais polas que acada o premio "Brigante di pietra" á mellor curtametraxe no Potenza Film Festival en Italia, e nominacións nos premios Mestre Mateo e Curtocircuíto en Galicia. Na súa filmografía, ademais de O camiño de Cova Eirós, destacan as curtametraxes A viaxe (2010), Lalínea (2006) e Porcototal (2005). Tamén dirixiu o documental Viva Mones! (2009). En 2018 comeza a traballar coa artista Idoia Cuesta en proxectos relacionados coa moda, a arte e o deseño.