Andrés Castro, Ozo Perozo e Alexandre Senande son os autores de Sentinelas da lúa carmesí, un álbum de banda deseñada -o primeiro dunha serie de tres-, que ambienta un relato de aventuras nun mundo derivado das lendas e mitos da tradición oral galega. Meigallos e covas das mouras mestúranse coas peripecias dunha cuadrilla de mozos que navegan entre o mundo real e o fantástico. O volume é un dos que abre a nova colección de banda deseñada da editorial Galaxia. Na presentación, que terá lugar o vindeiro mércores 17 de xaneiro ás 20h00 da tarde, participarán os tres autores. A entrada é libre ata completar aforo. 

Alexandre Senande naceu en Santiago de Compostela en 1991. Estudou Belas Artes na universidade de Vigo, na facultade de Pontevedra, e especializouse en debuxo e guión de cómic na Escola Profesional de Banda Deseñada “O Garaxe Hermético”. Comezou a súa carreira profesional coa obra Sentinelas da lúa carmesí.

Ozo Perozo naceu en Vigo en 1975 e traballa coma director no audiovisual galego, tendo participado en series como A lei de Santos, Método criminal ou Serramoura. Cunha ampla formación como guionista, escribiu para series como O Faro e Fontealba e actualmente imparte cursos de guión cinematográfico. Sentinelas da lúa carmesí é o seu primeiro traballo en banda deseñada.