Cando apagan os motores, os camioneiros e as camioneiras pescan, conversan, fan o amor, buscan, bailan, rezan… Pero, sobre todo, agardan, detidos á beira das estradas arxentinas, suspendidos nunha estraña dimensión do tempo mentres todo ao redor segue en movemento. Conversas fugaces, interferencias radiofónicas, paisaxes desencaixadas, gasolineiras, áreas de servizo, talleres de pneumáticos e moteles acumúlanse como nun soño crepuscular. Camionero é unha viaxe melancólica por un mundo a piques de desaparecer.

Francisco Marise é un cineasta arxentino afincado no País Vasco. Estudou Deseño de Imaxe e Son na Universidade de Bos Aires e cinema documental na Escola Internacional de Cinema e Televisión de San Antonio de los Baños, en Cuba. A súa primeira longametraxe, Para la guerra (2018), estreouse na sección Novos Directores do Festival de San Sebastián. Camionero é a súa segunda longametraxe.