Paula traballa nunha estancia, coidando os fillos dunha familia de produtores de soia, no interior da provincia de Bos Aires. Pouco dada á sociabilidade e máis ben reservada, a moza, de recursos económicos ínfimos, descobre que quedou embarazada dun mozo que a rexeita. Nestas condicións, Paula comprende que non ten outra opción que abortar. Pero esta vía pode facerse moi costa arriba para unha rapariga de recursos case inexistentes e sen xente á que recorrer. Como unha Mouchette actual, o filme aborda os avatares dos personaxes desde unha distancia observacional; con economía de recursos e mediante a construción dunha atmosfera naturalista, dá conta dunha brecha social inexpugnable que, lonxe de contraerse ante unha situación de necesidade, non deixa de medrar.