Un evento cinematográfico irrepetíbel dirixido por Andrew Dominik. One More Time With Feeling vai ser a primeira oportunidade de escoitar Skeleton Tree, o álbum de estudio número 16 de Nick Cave & the Bad Seeds, un filme que vai chegar ao cinema NUMAX o 8 de setembro de 2016, xusto un día antes do lanzamento de Skeleton Tree. O concepto orixinal de One More Time With Feeling derivou nalgo moito máis significativo cando Dominik comezou a esculcar no trasfondo tráxico das letras e os sons do álbum. Entre as cancións interpretando o novo álbum dos Bad Seeds atopamos entrevistas e gravacións de Dominik, acompañadas polas narracións e reflexións improvisadas de Cave. En branco e negro e cor, o resultado é un testamento fráxil, cru e verdadeiro dun artista tentando atopar o seu camiño no medio da escuridade.