Fatima é unha muller inmigrante que vive en Francia xunto ás súas dúas fillas: a rebelde adolescente de quince anos Souad e Nesrine, que aos seus dezaoito acaba de comezar a carreira de medicina. Fatima non sabe falar ben francés e está preocupada polo futuro das súas fillas, que son o seu orgullo e ledicia, pero tamén a causa de que perda o sono. Para poder pagar os seus estudos traballa sen descanso como limpadora, pero un día sofre un accidente que a obriga a gardar repouso. Daquela aproveitará ese momento para escribir ás súas fillas en árabe, para así poder dicirlles todo aquilo que nunca puideron expresar en francés.