Katia era xeoquímica e Maurice xeólogo. O Etna e o Stromboli, os seus referentes. Xuntos compartiron unha vida apaixonante, un amor volcánico e rebuldeiro vivido ao límite.

Nos anos 70 iniciaron unha procura conxunta que duraría dúas décadas e levaríaos a viaxar por todo o mundo para estudar a erupción dos volcáns. Zaire, Hawaii, Indonesia, Estados Unidos, Xapón... Maurice filmaba en 16mm e Katia facía fotos a pé dos cráteres. Nunca se viron unhas imaxes similares.

A partir de 200 horas de material de arquivo inédito e das notas e escritos persoais de Katia e Maurice, a artista Miranda July cóntanos o fascinante universo destes dous vulcanólogos inclasificables. O excepcional material de arquivo descóbrenos unha épica historia de amor entre dous exploradores que entregaron a súa vida ao estudo pioneiro dos volcáns.