Un fito fundamental da historia do documental xaponés e cuarta dunha serie de sete películas dirixidas polo colectivo cinematográfico Ogawa Productions que documenta o longo movemento de protesta do campesiñado contra a construción do novo aeroporto de Narita en Sanrizuka.

Logo de varios anos de protesta, as autoridades inician expropiacións forzosas, desencadeando unha gran violencia. O campesiñado, axudado polo estudantado, enfronta a loita cun renovado sentimento de resistencia. Os cineastas adéntranse no corazón da loita, seguen os preparativos dos combates e participan neles. Entre momentos de enorme tensión, dan voz aos labregos, ás razóns da súa resistencia, a súa cólera e as súas esperanzas.

Versión dixital exportada para esta proxección polo Athénée Français Cultural Center de Toquio | O pase do sábado 15 de xuño contará con presentación de Ricardo Matos Cabo, programador e investigador da obra de Ogawa Productions