Lupercais (Unha antoloxía posible) é o título da escolma que serve de presentación ao grupo de poetas que se reúne arredor do festival anual celebrado en Lugo baixo o nome, precisamente, de Lupercais. O libro, editado por Chan da Pólvora dentro da colección Sentulo, preséntase este venres dez de marzo, a partir das 19.30, na xornada inaugural do festival, que se desenvolverá ao longo de dous días no panóptico do Vello Cárcere, convertido en centro cultural. O acto non só é unha caste de crónica de presentación dun colectivo poético realmente sorprendente pola súa calidade (e diversidade) senón tamén unha oportunidade única para escoitar a algunhas das voces emerxentes da nova poesía galega, con nomes consagrados pola crítica e os lectores como Nieves Neira, Genaro da Silva, Xerardo Quintiá, Luís López Alonso, Antóm Fortes, Luís Valle ou Miguel Ángel Curiel, que nesta antoloxía de Chan da Polvora publica os seus primeiros poemas en galego. Son doce poetas que viven en Lugo nunha relación profundamente literaria, case bohemia, e que consolidaron a súa amizade arredor das Lupercais, un dos epicentros poéticos de Galicia.