O volume Andrómenas e credos reúne o froito de tres décadas de recolleita e estudo da mitoloxía popular de Cerdedo e a comarca de Terra de Montes.

Criaturas fantásticas, lugares marabillosos, paisaxes arroubadoras, espazos sagrados e umbilicais –a revelación da Montaña Máxica do Seixo–, heroes e viláns, costumes, ritos, contos, lendas, conxuros, milagres, obxectos de poder, relatos fundacionais…, portentos saídos do pobo e retornados ao pobo con aglaio e requinte.

Esta biblia da mitoloxía montañesa amasouse e aformigou tras bortelar ben bortelada a fariña contida nos foles da colección Cerdedo in the Voyager e da colección Solea Scripsit (2002-2025), masa copeada e enfornada de vagar na tafona de Edicións Morgante.

Para a elaboración desta “Suma mitolóxica” –o nº 27 da Voyager– volveuse zugar con fruición dos testemuños orais e escritos, sempre na procura do xenuíno, da orixinalidade, da palabra certa…, engadindo e corrixindo, primando a conservación, a valorización e a divulgación do material recadado.

Dende Cerdedo para o mundo, as liñas de investigación e intervención cultural (publicacións, roteiros, charlas, descubertas…) desenvolvidas no concello e na comarca de Montes anos andados convertéronse en referente ou fonte de inspiración para outros moitos investigadores e afeccionados, circunstancia que nos fai sentir fondamente satisfeitos. Sapere aude. Vai polas ánimas.