Nobuhiro Suwa chega especialmente desde Xapón para nos falar do proceso creativo do seu novo filme, O león dorme esta noite, que terá a súa estrea en salas de toda España o venres 27 de abril da man de NUMAX Distribución. Estreado na Sección Oficial de San Sebastián, O león dorme esta noite conta como gran protagonista co grande actor Jean-Pierre Léaud, que encarna a Jean, un nomeado actor de cinema, convocado a unha rodaxe no sur de Francia, moi preto da casa en que coñeceu na súa xuventude a Juliette, o grande amor da súa vida. Durante un descanso, aproveita para visitar unha amiga e percorrer os espazos de antano. Un grupo de nenos interrompe de súpeto a nostalxia que o axexa: preparan un filme de terror nas súas vacacións e comezan a perseguilo porque queren que Jean o protagonice. Este encontro, entre o que fora protagonista d'Os 400 golpes e os seus rebuldeiros sucesores, desencadea un conto fantástico inesperado e revelador bañado polo toque oriental característico do seu autor.

A sesión contará con tradución en director desde o xaponés grazas á colaboración da Casa Galicia-Japón. O encontro leva por título Un filme como un entroido, e conta entrada gratuíta até completar aforo. Podedes reservar xa a vosa entrada no correo [email protected], indicando nome completo e número de contacto.