Raparigas de uniforme é unha obra moi singular. Estreada en 1931 e dirixida pola austrohúngara Leontine Sagan coa colaboración do cineasta alemán Carl Froelich, a película pasou á historia do cinema por ser unha das primeiras obras en tratar abertamente o lesbianismo. Adaptación do libro homónimo de Christa Winsloe, a película está ambientada nun ríxido internado no que ingresa a adolescente Manuela tras o falecemento de seu pai. Manuela, ao igual que todas as rapazas do centro, suspira por Elizabeth, a profesora máis nova da institución.

A pesar de contar cun argumento tan arriscado para o seu tempo, o filme foi todo un éxito de crítica e público na súa estrea na República de Weimar, se ben sería prohibida tras o ascenso nazi ao poder por mor da súa crítica aberta á rixidez prusiana e as condutas autoritarias.

O filme, protagonizado en exclusiva por mulleres, é todo un referente pioneiro do cinema lésbico e a súa proxección inclúese no ciclo "Cinema LGBTQ+ e censura" que durante todo o mes celebra o Cineclube Mazarelos na Facultade de Filosofía e que terá en NUMAX este pase especial. A sesión contará con presentación e coloquio conducida por membros da asociación.