Fronte ás operacións de captura que buscan incluilo todo nun xénero ou réxime único, que escapes son posibles? Podemos relacionarnos co estraño sen pretender explicalo ou resolvelo? Como non capturar a marxe e evitar que o ex-céntrico se volva centro? Nesta conversación, acompañada de imaxes en movemento, sons e exercicios para desprazar a mirada, deixarémonos guiar por nocións provocativas, como o estranxeiro, o indeterminado e o desviado. Abrirémola porta a esa posibilidade da que falaba John Keats nunha carta, a de “estar en paz coa ambigüidade, quedarse coa dificultade das contradicións e non saber, acoller a pluralidade das versións”.

Valeria Mata é investigadora e antropóloga social. Cursou estudos na Universidade Complutense de Madrid, na Universidade Autónoma Metropolitana de Cidade de México, e na Escola de Estudos Asiáticos e Africanos en Londres. As súas liñas de investigación céntranse nos cruces entre as prácticas artísticas e a antropoloxía, a antropoloxía da viaxe e o turismo, e a dimensión política e cultural da comida. De 2015 a 2019 dirixiu MUEVE, unha biblioteca pública itinerante de publicacións independentes latinoamericanas. É autora dos libros Todo lo que se mueve (Comisura) e Plagie, copie, manipule, robe, reescriba (Comisura), publicados en España en 2022 e 2024 respectivamente.