A pesar do seu prematuro pasamento, a obra de Pier Paolo Pasolini (1922 - 1975) nas súas distintas linguaxes e soportes sitúano como un dos intelectuais máis influentes do século XX. No campo do cinema dáse a coñecer coa mítica Accattone, que inaugura unha sorte de segundo Neorrealismo apegado a personaxes que deambulan nas marxes da sociedade. Sen abandonar a súa preocupación polas clases populares a obra do intelectual boloñés esculca nas orixes da cultura cristiá n'O evanxeo segundo San Mateo e ofrece unha divertidísima sátira de corte marxista en Paxariños e paxarolos. A aclamación crítica chégalle a Pasolini con Teorema, corrosiva crítica á burguesía italiana, antes de embarcarse na Triloxía da vida da que, neste Foco, poderemos gozar d'O decamerón e Os contos de Canterbury.

• Martes 3 de setembro | Accattone (1961, 116')
• Martes 17 de setembro | O evanxeo segundo San Mateo (1964, 137')
• Martes 15 de outubro | Paxariños e paxarolos (1966, 87')
• Martes 29 de outubro | Teorema (1968, 93')
• Martes 5 de novembro | O decamerón (1971, 112')
• Martes 3 de decembro | Os contos de Canterbury (1972, 109')