Xa falta pouco para que poidamos gozar en pantalla grande de Cerrar los ojos, coa que Víctor Erice vén de enfeitizar a crítica e público en festivais como Cannes, Nova York ou Toronto, e que recibirá o Premio Donostia no Festival de San Sebastián o propio 29 de setembro. Para celebrar a volta do cineasta vasco á longametraxe tres décadas despois, en NUMAX acollemos o Foco Víctor Erice, un evento único que nos permitirá recuperar en estupendas copias restauradas as dúas obras que anunciaban a chegada dun talento único. O ciclo faise coa colaboración da distribuidora Avalon.

Comezamos con El espíritu de la colmena, un dos retratos máis emocionantes xamais feitos sobre o asombro e a aprendizaxe na infancia que conta coas inesquecibles interpretacións das pequenas Ana Torrent e Isabel Tellería na compaña de Fernando Fernán Gómez e Teresa Gimpera. Cun guión do propio Erice a catro mans con Ángel Fernández-Santos, o filme está ambientado nos anos de chumbo da postguerra española e inclúe algunhas das imaxes máis icónicas do noso cinema. O filme terá tres pases especiais os días 1, 5 e 9 de setembro.

A segunda cita co Foco Erice será coa non menos fermosa El sur, proxecto que o propio cineasta vasco considera inacabado e que está ambientado nunha vila do norte de España onde vive a pequena Estrella co seu pai, o médico Agustín, e súa nai, mestra represaliada. Unha obra «dunha fermosura inefable» (Ángel Fernández Santos) que terá pases os días 12, 16 e 19 de setembro.

A gran cita será o 29 de setembro coa estrea de Cerrar los ojos, «nova obra mestra para o cinema español. Un filme sen igual no cinema contemporáneo» (Manu Yáñez), protagonizado por Manolo Solo, Ana Torrent e José Coronado.