Impulsar a lectura e estimular o gusto polos libros e a literatura entre todos os públicos é o que Acción Cultural Española (AC/E) e a Biblioteca Nacional de España pretenden coa exposición Pasa página. Una invitación a la lectura, que se pode visitar na Sala de Guillotinas da Biblioteca ata o 25 de febreiro de 2018. A mostra está comisariada polo xornalista e escritor Jesús Marchamalo, e foi organizada no marco do Plan de Fomento da Lectura que desenvolve o Ministerio de Educación, Cultura e Deporte baixo o lema “Ler dache vidas extra”.

En Pasa página reivindícanse a lectura e a literatura mediante libros, fotografías, pezas audiovisuais e obxectos que ofrecen ao público unha reflexión cómplice e lúdica sobre o pracer de ler. Ademais, este percorrido, que contou coa asesoría pedagóxica do escritor Nando López, presta especial atención ás persoas lectoras máis novas, coa vontade de buscar unha conexión emocional e evocadora entre o seu mundo e o feito lector.