Intemperiadas, correspondencias interartes con Xela Arias é un proxecto comisariado por Charo Lopes para a Libraría NUMAX que conta co apoio da Deputación da Coruña. Ten como alicerce activar a pegada de Xela Arias: a sororidade instintiva, a desobediencia frente un equilibrio inxusto, a creatividade e a experimentación coa palabra son a base para que novas artistas dialoguen hoxe coa poeta falecida en 2003. Este é o punto de partida. O desafío? Transformar o estímulo literario da autora homenaxeada este ano coa celebración do Dia das Letras Galegas noutra cousa. A partir da poesía, desenvolver cadansúa obra-homenaxe, tendo como escenario privilexiado o propio espazo da libraría.

Para isto contaremos con cinco artistas diferentes, en cinco citas entre abril e outubro, que desenvolverán unha parte do seu proceso creativo no espazo da libraría, en horario de apertura ao público. Un happening a acontecer entre a bibliografia básica e complementaria dos andeis de NUMAX. Cinco artistas para desenvolver cinco disciplinas diferentes: Laura Tova (ilustración), Io Morales (téxtil), Jóia Rara [Acacia Ojea e Marta Gilino] (música), Verónica Vicente (fotografía), e Paula Pereira (cerámica). En poucos días daremos todo detalle da primeira das citas, o sábado 10 de abril, coa ilustradora Laura Tova.

#intemperiadas
En paralelo aos encontros do ciclo, e coa intención de democratizar a creación e abrir liñas de participación social, de forma segura, abrimos unha proposta en paralelo: mediante o uso do hashtag #intemperiadas convidamos a que todas as persoas que o desexen publiquen nas redes sociais a súa creación persoal de homenaxe a Xela Arias. Deste xeito, calquera usuaria de Instagram, Twitter ou Facebook pode publicar de forma aberta a súa creación, contribuíndo a divulgar a pegada da obra da autora homenaxeada este ano coa celebración das Letras Galegas. Fotografías, ilustracións, collages, textos… A participación e o formato é libre. No fin do ciclo realizarase unha selección de entre todas os contidos compartidos, con que se fará unha exposición de peche da actividade. A exposición será física, coas impresións en pequeno formato no espazo da libraría, no modo de literatura de cordel, e permanecerá unha semana exposta.

A comisaria
Charo Lopes é licenciada en xornalismo pola Universidade de Santiago de Compostela (2010), titulada superior en Fotografía Artística pola ESAD Antonio Faílde (2012) e Máster en Literatura, Cultura e Diversidade pola Universidade da Coruña (2018). Como poeta gañou o 1º premio Xuventude Crea 2014 por Random do quotidiano, o Fiz Vergara Vilariño, co que publicou De como acontece o fim do mundo (Espiral Maior, 2016), e o XXXV premio de poesía Cidade de Ourense, con Álbum (Aira Editorial, 2020). Participou no catálogo Território expandido do festival de fotografia Outono Fotográfico ​(Difusora, 2016), no Festival da Poesia no Condado (2017) e na obra coletiva Tecermos redes, crearmos comunidade. Estudos sobre a obra de María Reimondez (Xerais, 2020). Publicou "O que significa ser indígena?" no nº4 da Revista Ardora (2019), e "Sereias galegas" no nº7 da Revirada (2020). Como fotógrafa realizou cursos de especialización con profesionais como Julián Barón, Ricardo Cases, David Jimenez, Luis Malibrán ou Omar Josef. A sua serie Do ermo ​foi seleccionada no Xuventude Crea 2015 de Artes Plásticas e Fotografía, sendo exposta na Igrexa da Universidade de Santiago de Compostela (2015). Participou nas exposicións colectivas Pase(e)n e vexan, no Outono Fotográfico en Ourense (2011), Muller, arte e creatividade no Museo Municipal de Ourense  (2012) e O espello é noso? na Galeria Cubo de Vigo (2019).

Na actualidade é membro do consello de redacción e responsábel da coordinación de imaxe no periódico Novas da Galiza, dirixe o Portal Galego da Língua e é co-editora da revista caleidoscopica.gal. Como fotógrafa está especializada en retrato; no proxecto umaqualquer.com traballa a representación en chave feminista, suxerindo ás modelos un xogo performativo e apropiándose da imaxe como unha ferramenta de autocoñecemento. Charo Lopes achegounos un itinerario bibliográfico como introdución a Intemperiadas que podes consultar aquí.