Un ano máis, convertemos o treito final da rúa Concepción Arenal nunha sala de cinema a ceo aberto con dúas sesións de Cinema ao aire libre que celebramos dentro das actividades do Festival C do Concello de Santiago e a Deputación da Coruña, coa colaboración na parte técnica das nosas amigas de Mr. Misto.

Este ano propoñemos dúas películas moi diferentes que nos fai moita ilusión proxectar. A primeira, a mítica A invasión dos ladróns de corpos, dálle continuidade fóra da sala de cinema ao noso Nocturama de ciencia ficción. Dos anos 50 nos Estados Unidos viaxaremos á Italia dos 90 da man de Nanni Moretti. Co seu clásico estival Caro diario, podemos buscar os paralelismos entre o agosto en Roma e en Santiago, navegar polas illas Eolias e bailar ao ritmo de Juan Luis Guerra. As proxeccións darán inicio ás 21:45h se ben desde as 21:15h será posible ir collendo cadeira. O acceso é libre e gratuíto.

Martes 25 de agosto | 21:45h
A invasión dos ladróns de corpos (Invasion of the Body Snatchers, Don Siegel, 80 min, 1956, VOSE)
Este gran clásico da ciencia ficción dirixido por Don Siegel lévanos a unha pequena cidade de California onde empezan a suceder cousas moi estrañas. O doutor Miles Bennel regresa á cidade despois dunha conferencia e atópase con pacientes e coñecidos que din non recoñecer algúns dos seus familiares porque se comportan como se non fosen eles. Estes cambios causan estupor e medo entre os seus parentes e amigos. 

Mércores 26 de agosto | 21:45h
Caro diario (Nanni Moretti, 96 min, 1993, VOSE)
Filme dividido en tres episodios que reflicte a vida e os pensamentos do director Nanni Moretti a través do seu diario. "Na miña Vespa" é unha aproximación á vida cotiá de Roma durante o mes de agosto. En "Illas" visita a Gerardo, un amigo que leva once anos vivindo en Lipari. Xuntos percorren outras illas como Salina, Stromboli, Panarea e Alicudi. En "Médicos" narra o seu percorrido por hospitais e especialistas incapaces de diagnosticarlle a causa duns insoportables proídos.