Aos seus 97 anos, Pere Portabella é unha das figuras máis importantes do cinema español das últimas décadas, cunha obra arriscada e anovadora, tanto en termos estéticos como políticos. O Foco, que arranca hoxe en NUMAX ofrece unha ollada ampla e multidisciplinar cara ao cineasta catalán, destacando, por primeiro, a súa faceta como produtor ao frente de Films 59. No seo desta compañía viron a luz algunhas das obras máis relevantes do cinema moderno español como Viridiana, de Luis Buñuel, e dous títulos referenciais que serán proxectados na nosa pantalla: Los golfos (Carlos Saura, 1959) e El cochecito (Marco Ferreri, 1960). Tras ser inhabilitado durante unha década como produtor polas autoridades franquistas, o seu labor continuou tempo despois, destacando a produción, en 1997, da excepcional Tren de sombras, de José Luis Guerin, coa que abre o ciclo.

A finais dos sesenta arranca a carreira como director de Pere Portabella, completando unha filmografía marcada polo desafío ás narrativas clásicas e unha ollada multidisciplinar cara á creación artística, en continuo diálogo con poetas, músicos ou filósofos. Pintores como Joan Miró e Antoni Tapiès, o poeta Joan Brossa ou músicos como Carles Santos teñen participado na creación das súas películas. En anos do Tardofranquismo e a Transición, Portabella dirixe títulos de culto do cinema español máis underground e alternativo, como Vampir-Cuadecuc, Umbracle ou un artefacto político de alto alcance como El sopar, un encontro entre presos políticos filmado en 1974 que proxectaremos na súa versión actualizada de 2018.

A importancia histórica e política da súa figura desborda o estritamente cinematográfico, sendo elixido Senador en 1977 e participando na Comisión da Constitución de 1978. Porén, a súa actividade creativa non cesa, asinando en 1989 o filme de ficción Pont de Varsòvia. Xa no século XXI, realizada a curta Mudanza, filmada na Casa Museo de Federico García Lorca na Huerta de San Vicente (Granada) e Die Stille von Bach, que proxectaremos no mes de outubro en colaboración co Festival Ateneo Barroco 2024.

A obra de Portabella ten sido recoñecida internacionalmente con programas monográficos como o celebrado en 2001 no Museu d’Art Contemporani de Barcelona (MACBA), a homenaxe en 2003 do Centre Cultural George Pompidou de París ou a retrospectiva integral de toda a súa obra de 2003 no MOMA de Nova York.

Pere Portabella ― Produtor

30 de abril e 4 de maio
Tren de sombras (José Luis Guerin, 88', 1997)

7 de maio
Los golfos (Carlos Saura, 88', 1959)

14 de maio
El cochecito (Marco Ferreri, 85', 1960)

Pere Portabella ― Director

21 de maio
Vampir-Cuadecuc (Pere Portabella, 66', 1970) + Miró l'altre (15', 1969) + Acció Santos (12', 1973)

28 de maio
El sopar (Pere Portabella, 54', 1974-2018) + Mudanza (20', 2008)

30 de maio
Umbracle (Pere Portabella, 85', 1972)
Presentación do historiador e programador José Manuel Sande
+ 20:30 Presentación do libro Impugnar las normas. Intervenciones sobre arte, cine y política de Pere Portabella (Galaxia Gutenberg) na Libraría NUMAX

4 de xuño
Pont de Varsòvia (Pere Portabella, 84', 1989)

Outubro
El silencio antes de Bach (Die Stille von Bach) (102', 2007)
Incluído no Festival Ateneo Barroco 2024 (Ateneo de Santiago)