Illuminated Texts (1982, 180 min)

«Inspiradora nas súas técnicas, rapsódica nas súas paixóns, unha enciclopedia no seu ámbito, o filme traza a longa caída que vai do paraíso á barbarie moderna» (Art Gallery of Ontario)

Illuminated Texts empeza co propio Elder interpretando ao profesor da obra homónima de Ionesco, unha mestura de planos fixos e planos filmados con cámara ao ombreiro nos que vemos os seus paródicos intentos de educar matematicamente ao seu estudante, un prodixio da multiplicación e a suma que, porén, non pode manexarse minimamente coa resta. Nesta parte vemos de vez en cando insertos de fragmentos da obra, xunto con algo de música e sons que chegan do fondo. A actuación de Elder e o seu estudante é forzada e torpe, propia de dous actores que len os seus guións sendo conscientes da cámara, o cal confire un impulso adicional á irrupción de «Diabolus» de Marat/Sade de Weiss, unha obra que sobre todo está formada por unha obra dentro doutra obra.