Con só catorce anos, Antoine Doinel non pode evitar ser testemuña tanto das liortas conxugais dos seus pais coma das esixencias dun profesor ruín. Un día, asustado por non cumprir un castigo que lle impuxo o mestre, lata á escola co seu amigo René. Sen querelo, ve a súa nai acompañada por outro home; a culpa e o medo enléano nunha espiral de mentiras que van ao pouco furando o seu ánimo. Desexando fuxir de todos os seus problemas, soña con coñecer o mar e traza con René un plano de fuga.