A gran sensación da tempada no cinema español chega á nosa pantalla este venres 17 tras acadar 9 cabezóns nos Premios Goya. Gravada entre o Bierzo e a rapa das bestas de Sabucedo, As bestas inspírase no crime acontecido na aldea ourensá de Santoalla en 2010. Rodrigo Sorogoyen asina un thriller superlativo, dirixido coa súa capacidade natural para a tensión narrativa, e acompañado dun elenco excepcional, incluídos os gañadores do Goya a Mellor actor protagonista (Denis Ménochet) e de reparto (Luis Zahera).

Dentro do elenco d'As bestas destaca a presenza de Diego Anido no papel de Lorenzo, irmán de Xan, encarnado por Zahera. O talentoso actor compostelán é un habitual nas creacións audiovisuais e escénicas do noso país. Formado na escola Espazo Aberto, en 2004 múdase a Barcelona onde comeza a destacar en creacións escénicas como Cucaracha, Paperboy ou El alemán, fundando a compañia Sr. Serrano coa que gaña o León de Prata na Bienal de Venecia. No campo do cinema destacan os seus papeis en filmes de Alfonso Zarauza (Ons, Malencolía) ou Xacio Baño (Trote) entre outros.

As bestas terá a súa estrea en NUMAX o venres 17 con presentación e coloquio de Diego Anido e varios pases máis, xa sen acompañamento, ao longo de toda a semana.