Cinema

Grandes clásicos do Neorrealismo Italiano

Durante o mes de abril recuperamos tres obras mestras do Neorrealismo italiano, obra de Roberto Rossellini, Giuseppe de Santis e Vittorio de Sica.

Nas ruínas da Segunda Guerra Mundial agromou en Italia un movemento cinematográfico que mudou para sempre a Historia do Cinema. Un grupo de mozos cineastas decidiron sacar a cámara á rúa, filmar con actores non profesionais e relatar a vida das clases populares, un xesto político sen precedentes fundamental no devir do cinema moderno.

O Foco de NUMAX permítenos gozar de tres obras clave dirixidas polo principais expoñentes do movemento. Roberto Rossellini, do que proxectaremos Alemaña, ano cero, demoledor retrato de posguerra filmado nun Berlín en ruínas; de Giuseppe de Santis recuperamos Arroz amargo, a súa obra máis celebrada, cunha impresionante Silvana Mangano; e remataremos coa máxica Milagre en Milán, do gran Vittorio De Sica. Velaquí os datos completos da programación:

13, 14 e 17 de abril
Alemaña, ano cero (Roberto Rossellini, 1948, 74')

20, 24 e 25 de abril
Arroz amargo (Giuseppe De Santis, 1949, 108')

27, 30 de abril e 2 de maio
Milagre en milán (Vittorio De Sica, 1951, 92')