As primeiras cen persoas que merquen un abono para NUMAX, recibirán por cortesía de Edicións Positivas un exemplar de Notas sobre o cinematógrafo de Robert Bresson, na tradución ao galego que fixo Pepe Coira. Notas sobre o cinematógrafo é unha colección de aforismos que o director de Un condenado a morte escapou escribiu entre 1950 e 1974 e que recolle principalmente ensinanzas relacionadas co cinema pero que os seus numerosos lectores nas últimas décadas souberon ou quixeron trascender a calquera aspecto da arte, o pensamento ou a razón: "Fai aparecer o que sen ti quizais nunca se vería".

Modalidades de abono

Existen tres modalidades de abono, partindo dos 30 euros por ano, co que se recibe unha tarxeta persoal e intransferíbel coa que mercar entradas con prezo reducido (agás proxeccións especiais) e beneficiarse dun desconto do 5% na nosa libraría. Para as que queiran tamén colaborar co proxecto, existe a modalidade COLABORA, coa que por 120 euros por ano, ademais das vantaxes antes enumeradas, recíbense dez entradas de balde que pode empregar calquera persoa en calquera sesión e amplíase a entrada reducida tamén a proxeccións especiais. Por último, existe tamén a posibilidade de abono PROTEXE, na que a cambio de 500 euros anuais, a persoa abonada entra de balde a todas as proxeccións do cinema, merca entradas para un acompañante a prezo reducido e goza dun desconto do 20% no aluguer da sala de cinema. Ofrecemos tamén condicións especiais para colectivos de máis de 10 persoas en [email protected]. Calquera destas tres opcións están dispoñíbeis tanto na billeteira de NUMAX como neste web.