Nacido en Chicago en 1943 no seo dunha familia militar, Jon Jost é un autor de culto do cinema independente americano. Tras pasar máis de dous anos en prisión por negarse ao alistamento militar durante a Guerra do Vietnam, o cinema de Jost acada unha importante significación política cunha ollada crítica cara aos fundamentos da sociedade americana. Artista autodidacta, experimental, heterodoxo e viaxeiro, Jost desenvolve a súa obra na máis absoluta independencia, con filmes de baixo orzamento pero grandes doses de creatividade que lle valeron o seu recoñecemento en festivais como Sundance, a Berlinale ou unha retrospectiva no Museo de Arte Moderna de Nova York.

Tras seis décadas de creación nas marxes da industria do cinema, Jost leva meses a gravar en Galicia Casa do silencio, o seu novo filme cuxa estrea presentamos en colaboración con aCentral Folque. Co gallo da visita de Jost, que acompañará a estrea, celebramos un Foco con tres obras fundamentais da súa filmografía e un encontro A cor das palabras que nos permitirá coñecer de preto o seu traballo creativo. Entradas xa á venda.

Martes 28 de novembro | 19:45
Last Chants for a Slow Dance (Jon Jost, 1977, 90', VOSE)
Un home insatisfeito coa súa vida laboral e familiar abandona a súa casa, muller e fillos, para vagar durante semanas a través do estado de Montana. Unha road movie terminal, retrato dun home misántropo e amargado. O filme inclúese no top 100 de mellores filmes da historia para o crítico Jonathan Rosenbaum.
* O pase contará coa presentación do crítico e programador Javier Trigales

Venres 1 de decembro | 17:50 / Sábado 2 de decembro | 19:40
Casa do silencio (Jon Jost, 2023, VO)
En 2022 o realizador estadounidense Jon Jost recibe un convite do cineasta venezolano de ascendencia galega Diego Salomon para visitalo á súa casa familiar en Galicia. Tras pasar tres semanas no rural galego Jost atopa unha historia derivada dos tabús dunha familia galega emigrada a Venezuela.
"Un retrato cinematográfico dunha pequena parte de Galicia con cantantes, poetas, paisaxes e xente do común que tenta chegar ao espírito deste lugar. Como sucede na poesía, é oblicuo, indirecto e alude a historias que non podemos contarnos a nós mesmos" (Jon Jost)
* O pase do sábado contará con presentación e coloquio de Jon Jost

Sábado 2 de decembro | 17:45
All the Vermeers in New York (Jon Jost, 1990, 87, VOSE)
O corredor financeiro Gordon achégase a Anna, unha actriz francesa, na sala de Vermeer dunha galería de Nova York. Porén, o romance non resulta. Premio Caligari na Berlinale 1991.
* O pase contará con presentación de Jon Jost

Domingo 3 de decembro | 11:30
Encontro A cor das palabras: «Vivindo e aprendendo, unha vida no cinema», organizado co Concello de Santiago. Entrada gratuíta até completar aforo, reservas en [email protected]

Martes 5 de decembro | 17:45
Coming to Terms (Jon Jost, 2012, 90', VOSE)
Nunha reunión familiar un pai, protagonizado polo cineasta experimental James Benning, comunica unha importante decisión. A familia nun inicio oponse, pero finalmente acordan apoialo ata o fin. "Ao facer este filme tentei abordar un tema axeitado para alguén da miña idade: a morte e o seu impacto social. Aínda que non sexa evidente en principio, o filme pretende ser un retrato dunha familia máis grande: a dos Estados Unidos" (Jon Jost)