O pase inaugural da Mostra Internacional de Cinema Etnográfico faranos viaxar pola tradición oral do rural galego e os ritos e costumes dun poboado mineiro en Cuba. A sesión, duns 52 minutos de duración, contará coa presentación e posterior coloquio dos seus autores. A entrada é gratuíta até completar aforo, se ben é preciso retirar convite na billeteira de NUMAX a partir do luns 17 de agosto ás 17:00 horas, cun máximo de 2 entradas por persoa.

Martes 25 de agosto | 20:00

DENDE QUE CHEGOU A LUZ
Santiago Teijelo Vázquez | 2019 | 30' | Galicia
Na súa humilde cociña, Carmen cóntanos historias que tratan sobre a súa cultura e a súa sociedade infestadas de costume, folclore e supersticións. Mentres, o resto da familia continúa coa matanza do porco, unha tradición destinada a desaparecer, que vertebrou a sociedade da Galicia rural até principios do século XXI.

EN LA BOCA DE LA MINA
Brandán Cerviño | 2019 | 22' | Galicia-Cuba
A través dos habitantes de El Cobre, unha antiga cidade mineira cubana, coñecemos a celebración da tradición cimarrona e o recordo das primeiras sublevacións de escravos. Agora a primeira mina de América Latina está pechada e os seus habitantes viven da venda de esculturas relixiosas.