Kaurismäki explicou que Nubes Pasaxeiras foi filmado nun momento no que Finlandia estaba a atravesar un buraco económico, cun 25% da poboación en situación de desemprego. O filme conta a historia de como Ilona e Lauri, unha parella como outras tantas, van construíndo a súa vida como mellor poden. Ela é maître no restaurante Dubrovnik e el conductor de tranvías. As letras van vencendo e vense os dous sen emprego con pouco tempo de diferenza.

“Fixen un filme sobre xente sen traballo”. Despois, o finés despregou a súa xa famosa retranca e con galego miñoto: “É moi malo este filme. É mellor para vostedes que marchen da sala. Vaian comer ou tomar un copiño.” Prometeu non ficar máis de cinco minutos na sala mais finalmente acompañounos ata o final do filme e despediuse para voltar á súa casa atender os seus cans e seis galiñas que coida coa súa dona, a pintora Paula Oinonen.

Paula e Aki achegáronse desde Portugal no seu coche particular a Compostela, aproveitando que o director finés está en Galicia seguindo o rastro das fotografías de Ruth Mathilda Anderson. Chegaron por sorpresa ao acto de preapertura, ao que estaban convidadas tamén todas as persoas que avalaron mancomunadamente o crédito de 300.000 euros concedido por Coop57 co que se puido construír NUMAX.