Os filmes máis recentes da carteleira, proxectados nas mellores condicións técnicas e sempre en versión orixinal subtitulada no único cinema do centro da cidade.

Reestrea en copias novas de filmes rodados en celuloide e dixitalizados en 2 e 4K, a partir do escaneo dos negativos orixinais. Volve a ver nunha sala os teus filmes preferidos e os clásicos da historia do cinema.

Os ollos verdes. O cinema inédito de NUMAX. Un ciclo que renovamos ano a ano e que reúne os títulos máis arriscados e anovadores da carteleira.

A nosa proposta para crianzas chámase Petís NUMAX, unha estupenda selección de filmes ideal para iniciar na sétima arte ás petís da casa.

O ciclo Pioneiras recupera e pon en valor a figura de mulleres que, ademais de seren fundamentais na creación da linguaxe do cinema, abriron camiño para moitas cineastas que viñeron despois.

Pasaron 30 anos desde que o cineasta compostelán Alfonso Zarauza estrease nos cines Valle Inclán a súa primeira curtametraxe e en NUMAX temos a honra de celebrar as súas tres décadas de cinema cunha Retrospectiva case completa chea de sorpresas e convidadas. Será do sábado 26 de abril ao martes 27 de maio.

Se no inicio de 2025 proxectamos varias obras mestras de Mikio Naruse realizadas na década dos 50, agora damos continuidade á viaxe pola obra do xenio nipón con tres grandes filmes pertencentes á súa última etapa, a década dos 60.

Retrospectiva da obra do fundamental cineasta francés Maurice Pialat con motivo do centenario do seu nacemento. Inclúe 9 das súas 10 longametraxes restauradas en 2K ou 4K.