A ilustradora Nuria Díaz estará na Libraría NUMAX, acompañada da deseñadora Raquel Boo e do editor de Lunwerg Editores Javier Ortega, para falar do libro El Gran Hotel Wes Anderson, que acaba de saír do prelo. A presentación será o vindeiro mércores 12 de decembro ás 20:00 e acompañarase con imaxes e vídeos do traballo da artista.
O venres 28 de decembro ás 20:00 a historiadora e crítica de arte Natalia Poncela, acompañada de Teresa Moure, presenta Nem tudo é arte? Mod@s de olhar, que vén de saír do prelo dentro da Colecção Alicerces, da editora Através. A autora relanza o debate sobre arte contemporánea, dando pistas para outros modos de ollar, de sentir e de se apropiar do obxecto artístico, tendo en conta que as obras de arte non se reducen a meros obxectos de consumo ou de transación comercial.
A Libraría NUMAX acolle a presentación de Todo isto antes era noite, o libro de poemas de Lucía Aldao que vén de editar Apiario. Será o martes 18 de decembro ás 20:00 e estará acompañada da editora Antía Otero e do escritor Antón Lopo.
O músico e escritor leonés Ildefonso Rodríguez presenta, acabado de saír do prelo, o libro de prosas Informes y teorías (Narrativa, Editorial Eolas, León). No acto, o próximo xoves 13 de decembro ás 20:00, intervirán a poeta Olalla Cociña e o músico Bernardo Martínez: presentación, lectura comentada, fragmentos e fondos musicais.
O ciclo A cor das palabras. Encontros con cineastas organizado polo Concello de Santiago en colaboración co Cinema NUMAX contará cunha convidada moi especial. A cineasta catalá Meritxell Colell Aparicio é a autora de Con el viento, a nova estrea en salas de todo o Estado de NUMAX Distribución. O encontro con Colell terá lugar o sábado 1 de decembro ás 11:30 cunha duración estimada de 2 horas.
O venres 21 de decembro ás 20:00 terá lugar a presentación do poemario Actores vestidos de calle, de Luisa Castro, na Libraría NUMAX. Acompañará a autora o poeta Ismael Ramos.
