NUMAX é unha cooperativa de traballo asociado sen ánimo de lucro, polo que:

• Non pode contar con cargos directivos retribuídos.
• Non pode repartir o excedente económico entre as persoas socias, todo se reinviste na cooperativa.
• Non pode retribuír o capital social achegado nunha porcentaxe superior ao xuro legal do diñeiro.
• Non pode retribuír o traballo das socias con importes superiores nun 50% aos salarios establecidos nos convenios laborais de referencia.

A cooperativa ten percibido distintos apoios e financiamento público e só conta con financiamento externo da cooperativa de servizos financeiros Coop57, da que é socia. O saldo vivo das débedas financeiras a finais de 2024 ascendía a 103.617,20 euros.

A propiedade é colectiva, ríxese polo modelo democrático unha socia, un voto. Aposta por unha organización horizontal, sen xerarquías e cun reparto equilibrado de responsabilidades.

O volume de ingresos da cooperativa en 2024 ascendeu a 747.253,41 euros e obtivo un resultado provisional de 4.829,27 euros. Os Fondos Propios da cooperativa ascenden a 235.874,34 euros.

Guíase pola máxima de a igual traballo, igual retribución. As diferenzas entre socias traballadoras son mínimas e atenden a criterios obxectivos. Non pode existir unha diferenza superior ao 25% entre a retribución das socias e a da traballadora co salario máis baixo.