En 1994 un mozo de 21 anos daba os seus primeiros pasos na dirección de cinema coa súa primeira curtametraxe protagonizada por outro mozo, prometedor actor, que contaba con 23. O cineasta respondía ao nome de Alfonso Zarauza e o actor ao de Luis Tosar, a curta titulábase Hay que joderse e tivo a súa estrea nos cines Valle Inclán en febreiro de 1995. 30 anos e moitas películas despois chega o momento de botar a vista atrás e celebrar estas tres décadas de cinema nas que Alfonso Zarauza retratou as vidas da xente de Compostela en obras moi variadas en canto a formatos, linguaxes e duracións.

No Cinema NUMAX estamos moi felices de acoller unha retrospectiva case completa pola obra do noso querido Zarauza, cun programa que arranca o sábado 26 de abril cun evento moi especial no que reestreamos A noite que deixou de chover, peza clave da súa filmografía, dirixida en 2008 e protagonizada polo propio Tosar xunto a Miguel de Lira. Precisamente o actor carnotán, acompañado de Zarauza, ofrecerán presentación e coloquio desta sesión na que tamén se vai proxectar a curta A danza de Katiuska (1998), protagonizada por Ursia Gago e Luis Tosar.

A continuación, de martes en martes até finais de maio, programaremos todas as longametraxes do director compostelán, acompañadas de numerosas curtas que nestes 30 anos completaron unha obra creativa e poliédrica coa que tamén viaxaremos polas últimas tres décadas da cidade. Cada sesión irá, ademais, acompañada de numerosas persoas convidadas, actores e actrices que canda Zarauza rememorarán os procesos creativos das súas obras.

Calendario de proxeccións

Sábado 26 de abril | 21:00h
A noite que deixou de chover (90', 2008) + A danza de Katiuska (15', 1998)
Coloquio con Miguel de Lira e Alfonso Zarauza

Martes 29 de abril | 19:45h
Encallados (65', 2013) + Flâneur en Compostela (20', 2020)
Coloquio con Ricardo de Barreiro e Alfonso Zarauza

Martes 6 de maio | 19:30h
Os fenómenos (98', 2014) + Toro (7', 2004)
Coloquio con Xúlio Abonjo, Xosé A. Touriñán, Ledicia Sola e Alfonso Zarauza

Mércores 14 de maio | 19:40h
A viaxe dos Chévere (54', 2014) + Pontevedra, hora cero (36', 2023)
Coloquio con Patricia de Lorenzo, Xesús Ron e Alfonso Zarauza

Martes 20 de maio | 19:30h
Ons (87', 2020) + Intérpretes (10', 2021)
Coloquio con Melania Cruz e Alfonso Zarauza

Martes 27 de maio | 19:40h
Malencolía (75', 2021) + Sebastián (6', 2001)