O poeta Jesús Castro Yáñez (Baltar, A Pastoriza, 1992) achegarase á Libraría NUMAX para presentar o seu poemario Os nomes e os himnos, editado por Espiral Maior, co que obtivo o Premio Nacional de Poesía Xosemaría Pérez Parallé en 2015. Na presentación Castro Yáñez estará acompañado pola poeta Olalla Cociña. O acto terá lugar o xoves 30 de xuño ás 20:00.
(Foto: Lara Dopazo)
Tras máis dun ano de intenso traballo en NUMAX decidimos coller dúas semanas de vacacións para repousar un pouco e volver o 15 de xullo con máis forza ca nunca. Deste xeito, tanto o Cinema como a Libraría NUMAX permanecerán pechados ao público do 1 ao 14 de xullo, ambos incluídos.
Mireia Sentís e José Luis Gallero, impulsores da Biblioteca Afro Americana Madrid (BAAM), visitan a Libraría NUMAX para presentar dous novos títulos da colección, Una historia de la conciencia (Angela Davis) e Una cata de poder (Elaine Brown), e expoñer ante o público asistente as liñas centrais do seu traballo. O acto terá lugar o venres 10 de xuño ás 20:00.
Un ano máis, a Libraría NUMAX estará presente no S8, Mostra de Cinema Periférico, cunha selección de novidades editoriais arredor do cinema máis arriscado e anovador. O posto de venda ao público da Libraría NUMAX emprazarase na sede central do S8, situada no edificio Afundación da Coruña (Cantón Grande, 21-23), do xoves 2 ao sábado 4 de xuño.
A cineasta portuguesa Rita Azevedo Gomes visitará o Cinema NUMAX o venres 20 de maio para presentar ás 19:45 o seu último filme: A vinganza dunha muller. Ao día seguinte, sábado 21 ás 11:30, Azevedo Gomes impartirá unha clase maxistral titulada «Cinema: luz feliz e maligna» que se inclúe na Aula «Os ollos verdes» de NUMAX. A vinganza dunha muller está a ser distribuída en España por NUMAX Distribución e ten confirmada a súa exhibición nun mínimo de 15 salas de todo o Estado.
A Libraría NUMAX continúa a participar das actividades paralelas da Feira do Libro que se celebra até o 8 de maio na Alameda de Santiago. Este sábado 7 de maio, ás 12:00 horas, terá lugar a presentación do libro de poemas de María do Cebreiro O deserto, cuxo deseño é obra do Laboratorio NUMAX. No acto intervirán, amais da propia autora, Antía Otero, da editorial Apiario, e Irma Amado, da Libraría NUMAX.
